सोलापूर – तालुका पोलीस ठाण्याच्या हद्दीतील वडजी गावामध्ये दोन गटांमध्ये झालेल्या वादाच्या अनुषंगाने पोलिसांनी दोन्ही गटांना समुपदेशन करून वाद सामंजस्याने मिटविला. यावेळी संबंधित दोन्ही गटांतील व्यक्तींना आपापसातील वाद, मतभेद आणि संघर्ष यामध्ये वेळ वाया न घालवता सकारात्मक विचारसरणी स्वीकारून समाजासाठी आणि स्वतःच्या भविष्यासाठी विधायक कार्य करण्याबाबत मार्गदर्शन करण्यात आले.
पोलिसांच्या या समुपदेशनाला सकारात्मक प्रतिसाद देत दोन्ही गटांनी सामाजिक बांधिलकी जपत समाजोपयोगी कार्य करण्याचा निर्णय घेतला. त्यानुसार दोन्ही गटांच्या माध्यमातून एका जिल्हा परिषद शाळेला संगणक भेट देण्यात आला. या उपक्रमामुळे विद्यार्थ्यांना आधुनिक तंत्रज्ञानाच्या माध्यमातून शिक्षण घेण्यास मदत होणार आहे.
वादातून संवाद, संघर्षातून सहकार्य आणि नकारात्मकतेतून सकारात्मकतेकडे असा संदेश या उपक्रमातून देण्यात आला आहे. कोणताही वाद हा चर्चेतून व समंजसपणातून सोडविता येऊ शकतो. तसेच व्यक्तीने आपल्या ऊर्जेचा उपयोग भांडण-तंट्यांमध्ये न करता स्वतःच्या प्रगतीसाठी आणि समाजाच्या हितासाठी करावा, हा या उपक्रमामागील प्रमुख उद्देश आहे.
पोलिसांचे कार्य केवळ कायदा व सुव्यवस्था राखण्यापुरते मर्यादित नसून, समाजामध्ये शांतता, सलोखा, सामाजिक बांधिलकी आणि सकारात्मक परिवर्तन घडवून आणणे हेदेखील पोलिसांचे महत्त्वाचे कर्तव्य आहे. या उपक्रमातून त्याचे उत्तम उदाहरण समोर आले आहे.
“भांडण विसरा, प्रगतीचा ध्यास धरा; संघर्ष नव्हे, सहकार्याचा मार्ग निवडा!”
अशा प्रकारे पोलिसांच्या समुपदेशनातून दोन गटांमध्ये सलोखा निर्माण होऊन त्याचे रूपांतर विद्यार्थ्यांच्या शैक्षणिक हिताच्या सामाजिक उपक्रमात झाले.
About the Author
